有好多人鍾意啲星就當正人哋係男友/老公，最好從此所有女人都埋唔到佢身，宜得佢孤獨終老，咁就可以永遠"意淫"佢。我從來都唔係呢一type，所以當Keanu Reeves終於肯拍拖，我不知幾咁開心！

開心起上嚟，本來係想即刻寫分析，但努力咗好耐，都check唔到阿女朋友Alexandra Grant嘅生日日期，今日又有朋友呼喚話想睇，咁好啦，齋睇Keanu個星盤講住先。

首先，Keanu嘅處女太陽水星都喺第12宮，習慣將一切低調處理、收埋收埋，但據知Alexandra卻係少數有本事撬開佢把口，有能力令佢放心傾訴自身多年來嘅痛苦，最難得係連糾纏佢20年嘅喪女喪偶之苦，佢本來埋得最深嘅秘密，都肯同Alexandra講，肯講就係邁向治癒嘅第一步。

至於點解Alexandra有咁嘅本事？據熟知佢嘅朋友所講，Alexandra除咗擁有藝術家嘅體貼善感之外，為人亦溫柔慈愛。再講，佢淨係耐性已經贏晒全世界對Keanu嗒糖嘅女人，喂，人哋用咗十年嚟同Keanu做朋友，無花無假足足十年至攻陷Keanu由巨蟹月亮&金星加持、儼如銅牆鐵壁嘅心防，我俾你有咁嘅耐性，都驚你冇力拆佢道牆啦！所以，大家應該服氣喇啩！

再講，處女男鍾意有氣質嘅女人，作為多才多藝成功藝術家嘅Alexandra有喎！巨蟹月亮金星鍾意對佢永遠溫柔慈愛關懷嘅女人，Alexandra合格有凸！另外Keanu月亮金星喺第11宮，嗰種既係朋友/夥伴又係情人嘅感情關係至啱佢，所以本身係佢朋友兼生意拍檔嘅Alexandra就完全fit到呢個需求。

所以，我嘅conclusion就係：我永遠嘅男神Keanu，尋覓半生，終於搵到啱晒佢需求嘅另一半！By the way，上升同太陽都喺處女嘅Keanu來年感情運同創作運都會好到癲，應該會事業愛情兩得意。2022年直情有結婚運添！不過無論佢最終結唔結婚都好，都希望佢以後開開心心，孤獨悲傷遠離佢。

莉莉芙的 Facebook https://www.facebook.com/%E8%8E%89%E8%8E%89%E8%8A%99-1447716898886595/